2025

Filmuffnahme vom 5. März 2025 am Schnitzelbank-Benefiz-Abend.

---

Do will doch d Stüürbehöörde – isch das no normaal? –
dass yych für s Voogelhüüsli Äigemietwäärt zahl.
Jetz duen y s zläid im näggschte Mäi, grad nach em Briete,
für 1000 Stutz pro Nacht als B&B vermiete.

S hoggt äine queer ufs Bänggli, säit: Jetz han y Duurscht.
Sy Hündli schifft an Pfohl. Denn bättlets e Stügg Wuurscht.
Är rieft ins Handy: Doo hets Platz, do inne hogg y.
Das isch no grooss, das Münschter. – Halleluja sog y. 

Me will jetz d Freie-Strooss begriene, s macht ys stolz:
S git Laubböim, Noodleböim, Gebüsch und Unterholz.
Und uf ere Liechtig zwüsche Föhre und Plataane
do stellt me denn no soone Sarco-Kapsle aane. 

Won ych will fahre, isch – und sofort blyb y stoo –
no sone sälbscht-laufende Fuessgänger koo.
So äine, wo der Bligg voll konzentriert nach unde het
und s Update ”How to cross a street” grad noonig gfunde het.

Es bruucht nit vyyl, scho wird e Bärner zum ene Bärnerli.
E Zürcher Zürcherli. Dr Glarner wird zum Glärnerli.
Dr Cramer Crämerli. E Bueb wird zume Biebli.
Doch wenn äin Riebli häisst, denn häisst er halt scho Riebli.

Hänn Sii das au scho ghöört? Jä näi, jetz mien Sii loose.
- - -  . . .  - - -  . . .  - - -  . . .  - - -  . . .  - - -  . . .  - - - .
Die wo jetz nüt verstande hänn – oh jeeminee –,
die loose offebaar no immer U K W. 

Do säit der Fährimaa: Guet also, denn erkläär y.
Sygs e binääri oder nonbinääri Fähri,
s isch äifach soo, dass wenn die Fähri do nit wääri,
denn trampti s Cläri uf em Fähristääg ins Lääri.

Wo d Lehrerin zum Hansli säit: Mach nit dr Gloon,
frogt dää: Spüür ych do bitz e Mikro-Aggression?
Das isch doch toxisch, soo wie Sii das kommentiere.
Hän Sii käi Wyterbildig im De-eskaliere?

​D Schwyz sott nöii kläini AKW-li haa.
Nur wo hets Platz? – Do bietet sich doch s Hörnli aa.
Im oobere Däil hän die bestimmt no zwäi-drei Aare.
Und au fürs Ändlaager wäre si erfahre. 

​Wenn d Frau Martullo referiert, ischs wie bim Babbe:
Glyychi Geestik, glyyche Doonfall, glyychi Klabbe.
Die het das geerbt, die aarmi Frau, und s wär s Brutaale,
wenn sii für daas denn au no Eerbschaftsstüür miesst zahle. 

​Wenn die Junge z Bärn fürs Kliima demonschtriere
und währenddäm die Alte z Brüssel prozessiere,
isch für die Mittelalterlige d Zyt am beschte,
um in Rueh der nöischti  S U V go z teschte.

​Do hämmer s M-R-I vo Lääbere, Niere, Lunge,
alles beschtens, säit der Huusarzt, wien e Junge!
Und öppis anders no, e Detail, nur e kläins: 
Sii mien käi Angscht haa wägem Häärz. – Sii hän jo käins.