2026

Filmuffnahme vom 18. Februar 2026 am Schnitzelbank-Benefiz-Abend.

---

Dr Herr Profässer Chrischt hoggt in den Oobestunde
zämme mit eme Äiwääg-Grill am Rhyyboord unde.
S git Pouletbrüschtli. – Denn zum Zmittag het dä Maa
in dr Mensa numme «planted chicken» ghaa. 

Schyynts sölls bim Wysse Huus e riise Ballsaal gää.
Für d Schwyz duets öppis Kläiners, dänggt dr Parmelää.
Hejoo, e Tiny-Hüüsli längt im grosse Ganze.
Sunscht miesst äär mit dr Käller-Sutter jo no danze.

In dr Nootschloofstell do höörsch dr Läiter riefe:
S Finanzdep. stoht voruss zum d Biecher überbriefe!
Die ganzi Hektik isch für nüt, denn s stellt sich uuse:
D Tanja Soland frogt nur, ob si doo könn pfuuse. 

Das isch e Grampf, säit d Huebere, wägem C-O zwäi.
Käi Fläisch, käi Fuurz, käi Fluug, am beschte blybsch dehäi.
Mit guetem Gfühl kaasch nur e Grüzfahrt unternäh,
wills jo im Wasser gaar käi Fuessabdrugg ka gää. 

Dr Pfischter will die Flieger us den U-S-A
jetz in dr Variante «ohne Triebwerk» haa.
Es häig in Züüri doch bestimmt vom letschte Johr
no drei-vier ussrangierti Laubblööser voor. 

Wenn s Fäärnseh d Bilder vo de Schnitzelbängg verbräitet
und die Halbierig kunnt, denn simmer vorberäitet.
–   –   –    
–   –   –     

Jä näi, was machsch so lang? rieft s Bernadette em Heiner.
Dasch doch käi Häxerei, dä Underfluurcontainer.
Do schreit dr Heiner zrugg: Jetz waart, y kaa nit koo!
S het mer dr Hund mitsamt dr Läine yynegnoo. 

Jetz nach däm E-S-C het Basel nümm vyyl z mälde.
Drum syyg dr Cramer küürzlig züüglet – uf Birsfälde.
Är häig e Wohnig mit eme Balkon voornedraa
und lächli jeedesmoll, wenns blitzt, in d Kamera. 

Falls me dä Cybertruck für d Schwyz modifiziert,
denn wird die Kischte ohni d Reeder blau laggiert,
drei rundi Löcher dryy, äins bruun, äins wyss, äins grien,
wo d Lüt die lääre Fläsche yynewäärfe dien. 

Um dr Innerstadt die grieni Wand z erspaare,
will jetz dr Moritz Suter ussenumme fahre.
Und für sich sälber baut er denn – so vyyl y wäiss –
in d Auguschtinergass diräggt e Stumpegläis.  

Am Badisch Bahnhof dängg y, ob das Schild ächt ächt syg,
und froog e Bähnler: Stimmt das, Perron 63?
Nänäi, säit dä, e so vyyl Gläis hän mir nit nöötig.
Das isch nur d Aazäig vo dr Aazahl Stund Verspöötig.