1998

Gescht zoobe faxt der PTT-Diräggter Rey
no de Bahamas: Haben Sie noch Zimmer frei?
Und d Antwort het er grad  vom andere Rey bykoo:
S isch scheen und warm, de kasch dr Filz dehaime loo.

Y bii mit myynere Frau am Match gsii gege GC.
No voor em Aapfiff segglet sii beraits uff s WC.
Wo sii denn zrugg kunnt, stoht s scho drei-null, s isch e Wahn!
Und alles pfyfft, doch sii schreit: Bravo Moldovan!

Wo der Gortbatschow isch s Schwyzerland ko bsueche, 
do git me ihm halt e Glaas Moscht zem Versueche.
Doch äär keert  um, denn äär hätt lieber e Glaas Wyy griegt,
will äär, wenn äär "Glaas  Moscht" nur hehrt, en Allergyy griegt.

Der Meier-vier vom Spiegelhoof fahrt wien e Schelm
im gääle Biker-Dress und mit em coole Helm.
Beraits am Fischmäärt kybbt er syttlig hart uf d Stai.
Do schreit e Schwoob: Des muess der noi Mercedes sai!

Es syyg der grand old man Johannes Paul  der zwait
nit nur der wichtigscht, au der greescht Maa wyt und brait.
Dasch loogisch, maint doo ain bim dritte Kaffi Lutz,
dää het der Kopf in  Rom und s Fuudi in Vaduz.

Im Bläsischuelhuus konfisziert d Frau Lang scho glyy
bim Ibrahim sym Tamagotschi d Batteryy.
Jetz macht s nimm Bybs no Babs, jetz duets nimm enerviere.
Oh, kennt men au bim Blocher d Akku  konfisziere.

Zwai Stund Franzi stoht im Plaan und ai  Stund Gschicht,
e halb Stund Dytsch pro Wuche, Geegi au (villicht), 
acht  Stund Internet, e Viertelstund Natuur.
Dasch s Programm. Und s näggscht Johr mach y scho d Matuur.

In Bärn im Bundeshuus bespricht me jeede Moorge:
Wie kennt me nur der Ogi artgerächt entsoorge?
Me miesst die Sach halt mit em Vatikaan ereertere
und ihn zem Erzbischoff vo Kanderstäg befeerdere.

Im Basler Roothuus diskutiert  me jeede Moorge:
Wie könnt me nur der Grossrot Barth gerächt entsoorge?
Me  miesst die Sach halt mit em Vatikan ereertere
und ihn zem Erzbischoff vo Buebedorf befeerdere.

Wo n yych do kirzlig Drämmli gfahre bi im  Stress, 
heer ych statt Banggverain d Aasaag „UBS“.
Isch daas jetz s Motto, wo für unser Basel wiirbt,
oder haisst das aifach: Unser Basel  stiirbt?
He nai, s isch Ussverkauf à Bâle, s isch alles fail!
D Museee  wandere byschbiilswyys nach Weil.
Au Novartis, Hoff-Roche, Thomy-Frank und  BiZ 
verleege näggschtens schyynts der Sitz in Kanton Schwyyz.
Beraits  scho hange säggs vo unsere Picasso
in Texas imme Schubbe zwische Colt und Lasso. 
Aadje Määrtplatz, singt d Hermine Hägeli,
E viva Portugal, brummt in sym Grab der Tinguely.
Wär e Ballett will gseh, dä muess uf Ziri jette, 
d Frau Merian duet s Vermeege uff d Bahamas rette.
Au im Zolli waiss kain me rächt, was woo isch,
der Minu maagret ab, bis er gaar nim doo isch. 
D Christoph-Merian-Stiftig schwindet über Nacht,
und d Basler Läggerli, die wäärde z Hongkong gmacht.
D Josephsklinik leest sich uff, und ganz diskreet
goht s Truudi Gäärschter siibe Johr lang ins Tibet.
S Faasnachtscomité residiert in Boltige
und Schnitzelbängg heersch nur no in der Couronne z Oltige.
He nai, s isch nuur e beese Draum mit Häppy-Änd: 
Mir griege jo vo Lieschtel no s Kulturprozänt!