2014

Wo nach em Moorgesträich - es isch scho lengschtens häll -
der Megge häimwäärts drummlet, säit e Schugger: Gäll,
dängg ans Gsetz, denn s git käi Ussnahm, guete Maa.
Zünd bitte s Liecht am Kopfladäärnli wiider aa.

S isch jo bekannt, dass ohni d Russe nüt me lauft.
Jetz hänn die schyynts beräits der Sauber-Rennstall kauft.
Jä, wemmer Glügg hänn und s lieb Frooge nit vergässe,
hänn sii villicht au an der BVB Inträsse.

Mii stöört an Wiehnacht das Tattoo doch nit im Gringschte.
Der Juillard well au äins an Ooschtere und an Pfingschte.
Und wenn er au no äins könnt haa an Allerhäilige,
wurd är der Liebi Gott am Gschäftserfolg bedäilige.

Wo der Balmer, schnuufend wien e Schwäärarbäiter,
wäge Verstopfig uff der Schüssle hoggt, do säit er:
Wenns scho käi Honoraar git für die Aarbet doo,
so miesst y weenigschtens e Sitzigsgäld bikoo.

Do kürzlig rieft der Hansli uss und säit: Verdelli!
D Frau Vogt im Rächne und d Frau Stämpfli in der Relli,
d Frau Lutz im Duurne und d Frau Hubesack im Schryybe:
Me kaa die Frauequoote jo au überdryybe.

Do sitzt d Frau Merian nach ere Wanderig über d Flueh
im Räbstogg z Buus und loost em Florian Schneider zue
und säit, wo dää zem x-te Moll sy Väärs duet bringe:
Y stimm jo näi, wenn d wotsch, nur bitte höör uf singe.

Das isch doch typisch für dä Zürcher Chefredaggter:
Jetz bringt er neuerdings dä Schyssdrägg no kompaggter.
De frogsch di scho, werum sii s dreimoll uusegänn,
wo miir doch numme zwäimoll Kehrichtabfuehr hänn.

Es kaa für d Gsundhäit gföhrlig syy, e Brief z spediere,
denn wenn d der Bryys höörsch, fangsch aa hyperventiliere.
Und bimme Päggli hebsch dii schwindlig an der Theke.
Drum findsch jetz d Schalter als wie meh in Apitheke.

Werum het är das Bild, wo google druff stoht, gnoo?
Lut Baschi Dürr söll druss e Geegegschäft entstoh.
Im Google-Hauptsitz z Kalifornie hang derfüür
scho bald en ähnligs Bild, uf däm stoht Baschi Dürr.

Jeeden Oobe das Repriise-Äinerläi:
en alten Alte und en alte Fall für zwäi.
Derbyy wird s Färnseh jo mit de Weck und mit Matter
vom Fall für zwäi scho meh zem Fall für der Bestatter.