2006

Bim Iiberflug vom Süde in die gmässigt Zoone
dien mir Vögel Basel-Stadt mit Schiss verschoone.
Me het uns gärn do. – Aber z Riechen us bim Lande,
won y my Näscht suech, han y d Wält denn nimm verstande.

Am Määntig Lääse und am Zyschtig Uffsatz schryybe,
am Mittwuch moole mer mit Wasserfarb uff d Schyybe,
am Donnschtig hämmer Haimetkunde, und am Frytig
schaff y als Redakter bi der Basler Zytig.

Jä offebaar dien sich die Händy-Lääde lohne.
Die ganzi Innerstadt isch ai mobyyli Zoone.
Do kaas firs Aagebot und d Vyylfalt jo nit schaade,
hets zwischeninn dr aint und ander Glaiderlaade.

Gäbs in der Freie Strooss e Porta Alpina
mit ere Verbindig, nit uff Mailand, nai uff China,
denn kenntsch die Fluet vo Glaiderlääde ändlig stoppe
und d Kunde könnte grad im Uursprungsland go shope.

Jetz goht der Jögge Schild uf Bärn, und zwoor olympisch.
Mer löhn en goh, will är no fit für neii Gimp isch.
Im Unterschiid zem Ospel, wo mer au löhn goh,
darf der Jögge jederzyt au wiider koo.

Ganz lyyslig huucht e Schugger in sy Handy: Schatz,
loos, stell dy Manta bitte schnäll an Wettstaiplatz
und due denn d Schyybe statt uf Drei uf halber Zwai.
Es fählt mer numme no ai Buess, denn kan y hai.

Im Basler Zolli maint e Zwärgflusspfärd zem andere:
Hee kumm, mer bräche zämmen uss und gehn go wandere.
Doch scho am Aubärg hächlet s ander und sait blaich:
Loos, ohni Nordic-Walking-Stegg isch das e Saich.

Will die vo Lieschtel hälfe Basel finanziere,
dien mir uns bi der Wasserfalle revanchiere.
Jä, mir sinn ähnlig generöös, so länggts wohrschyynli
fir knapp finf Meter Sail und fir e halbs Kabyynli.

S neie Dramhaltstelle-Hyysli isch kreïert,
s isch gformt und gnormt und ISO-zertifizioniert.
Der Standort duet me von ere Taskforce brieffe loo,
und ganz am Schluss git no der Haimetschutz sy Nai.

Iiberlaschtig, Black-out, Stroomussfall, Verspeetig:
Jä, d SBB die hätte Troubleshooting neetig.
Doch sit kurzem hets die Firma jetz glaub grafft:
S lauft wiider guet, sytdäm der Tschudi nimm dert schafft.

Wo die ganzi Kompanie am Oobe spoot
noonem Dusche no zem Spermie-Spände goht,
vertailt me vorsichtshalber jedem e Gamälle
mit warmer Ovi drin zer Sterggig vo de Zälle.

Y sehs eich aa, ihr händ doch dänggt bim letschte Värs:
Jetz wird er aber langsam alt und lyycht pervärs.
Jä wennd als Bänggler wotsch am Schwyzer Färnseh koo,
muesch dy uffs Niveau vo däm Sänder aabeloo.