Porträt
|
Wenn me die erschte Vögel heert singe, isch das e Zaiche, ass der Winter z Änd goht. Zämme mit andere schreege Vögel isch denn z Basel ammen au der Singvogel unterwägs. Är singt do und deert, lut und fräch, schreeg und falsch. Underem Johr aber hebt är der Schnabel.
Scho als glaine Bueb het dr Singvogel gwisst, was är will. Fasnacht isch ihm aifach im Bluet gsi. Syni erschte Schnitzelbängg mit aigene Helge het är als 6-Jährige gsunge. Speeter het är aber au emool e kurzi Phase gha, wo n är lieber uff eme Waggiswaage gsi wär. Also het är sich sy aigene Waage baschtlet, mit vyle glatte Sprich druff. Als Jugedlige isch är denn vor allem znacht als Waggis unterwägs gsi, immer fir e Plausch z ha. So het är zem Byspil im Halbdunggle an dr Schnydergass Zeedel verdailt, wo uusgseh hänn wie d Zeedel vo de Clique, aber uff ihm syne Zeedel isch gar nyt druff gstande. Si hän nur graui Linie gha. D Lyt hän im Dunggle probiert z läse und sin denn in Glächter uusbroche, wenn si gmerggt hänn, ass si ynegflooge sinn. Aimool het är au e riisige Sunneschirm dur d Gässli drait. Am andere Daag het är syni Ärm fascht nim kenne beweege, vor luuter Muskelkater! Denn hets fasnachtsmässig e paar ruehigeri Johr gä, bis är anne 1994 e paar Daag vor dr Fasnacht ze synere Schweschter gsait het: „Hesch mr nid e Goschdym, y mecht go Schnitzelbängg singe!“ S ainzig, wo passt het, isch e gääle Vogel gsi und so isch dr Singvogel entstande! |
Sit em Aafang schafft der Singvogel mit em glyyche Helgemooler zämme. Jedes Johr vor der Fasnacht wärde d Sujets gmainsam besproche. S Goschdyym allerdings het denn scho nach em erschte Johr miesse amme andere wyyche; d Figuur vom Vogel isch ergänzt worde mit der Figuur vo dr Papagena, wo als Helgedräägere amtet.
Sit 1997 isch der Singvogel bim Schnitzelbangg-Comité und lauft zämme mit dr Papagena am Määntig- und am Mittwuchoobe jewyyle d Route vo de Comité-Schnitzelbängg (Baize und Bühneveraastaltige im Gross- und Glaibasel).
Dr Singvogel het an verschiidene Vorfasnachtsveraastaltige mitgmacht (Drummeli, Charivari, Ladärnli, Ridicule, Pfyfferli, Ufftaggt).
Sit 1997 isch der Singvogel bim Schnitzelbangg-Comité und lauft zämme mit dr Papagena am Määntig- und am Mittwuchoobe jewyyle d Route vo de Comité-Schnitzelbängg (Baize und Bühneveraastaltige im Gross- und Glaibasel).
Dr Singvogel het an verschiidene Vorfasnachtsveraastaltige mitgmacht (Drummeli, Charivari, Ladärnli, Ridicule, Pfyfferli, Ufftaggt).
Mängmol stoht er au, zämme mit de Stroossewischer, unter em Namme "Anneli und Hansli" uf dr Bühni.
