1999

Y bii zem dritte Mool scho hitt go Syyrup kaufe
wäge Halsweh, Hueschteraiz und Naaselaufe.
Scho wiider Syyrup, wunderet sich s Frollain sehr.
Dasch loogisch, sag y, habe fertig, Flasche lehr.

Im Zolli haige d Elefante nit vyyl z lache.
Me muess halt gopfridstutz mit däänen eppis mache!
Denn dangg der  Migros ligt doch d Leesig vor der Tiire:
S isch jo nit wyt bis in das Wellness-Center fiire.

Es het d Uriella zwaar kai Orinad-Frisuur,
kai Fielmann-Gsicht, kai Bang- und Olufsen-Figuur,
doch si ka lächle und ka liege ohni z friere.
Die kennt jo s Meteo bim Färnseh presentiere!

In der Pause stoht der Hansli uf e Stuel
und rieft: Mir pfallt das nimm, das is e Saich, die Suel!
Är zieht e Blatt zem Schuelsagg uss und gläbbts an d Schyybe.
Das is e Sammelklaag. Miend nur no untersryybe.

Me haigi kirzlig schyynts der Bluemefritz  ernennt
zem „Chefbeamten im Justizdepartement“.
D Regierig haig zer  Usswahl (mai, hänn dien e Schregg ghaa!)
als Mitbewärber nur der Willy Werner Deck ghaa.

S isch loogisch, dass der Tschudi nit sehr lang studiert het,
bis är die Reegle für dä Krais-Verkehr kapiert het:
Me wartet achtsam vor em Kraisel uf ne Lugge
und duet linggs blingge, zem dernoo rächts yynedrugge.

Aimol pro Johr schrybt au der Platz e Satz in d Baz.
Das isch o.k., aimol pro Johr, dasch gnueg, Herr Platz!
Doch im Vertraue gsait, ych find, Sii ibertryybe,
wenn sii der Räscht  vom Johr der Hobi leen lo schryybe.

Zwai strammi Baselbieter Schugger in Zivil
verfolge grad e haissi Hanfspur z Reigoldswil.
Do maint der aint bim Aabligg vor der erschte Pflanze:
Jetz feelt ys nur no soone V-Frau zum Verwanze!

Sit kurzem isst der Matthias Cabiallavetta
statt Château-Briand Wurschtsalaat garniert mit Feta. 
Doch  au der Ospelt gsehsch e neis Rezäpt kreiere
und yyfrig in dr Bouilla-Börse-Baisse riehre.

Mir gohts als Schnitzelbänggler doo im Fasnachtsstress
wie mym private Konto bi der UBS:
Weenig Inhalt, vyyl Papyyr, e schyggi Form,
was uuseluegt isch klai, und d Speese sin enorm.

Es sinn die Wirtschaftslyt, bevoor sii  sich hän troffe, 
zwische Kloschters und Davos im Schnee versoffe.
Nur  unser Dreyfuess Rutli stoht zer Zyt dert hinde.
Hejoo, die het Erfahrig im Sich-uusewinde.

Dasch doch kai Leesig, wies dr FCB vermuetet,
wenn me jetz nomeh Lux uf d Schützematte fluetet.
Das bringt uns dr Tabällespitze au nid neecher,
he nai, im Dunggle isch doch d  Träfferquote heecher.

Im Bläsischuelhuus unde rächts im erschte Kindsgi
dert schafft e Praktikantin – Sii, die haisst Velinski! 
Jetz losst der Cornaz amme d Bürotiire offe.
Bim nägschte Star-Report, do darf me also hoffe!

Der Källner in der Couronne z Hagethal,  dä Knilch,
anstatt Champagner bringt dä Duubel zwai Glas Milch.
Är haigi  aagnoh, dass mir Schwyzer, wenn mir bstelle,
am liebschten e bi-laterali Rundi welle.