2003

Der Basler Minschterängel schrybt am Meteo,
är haig e Tipp fürs Wätter uf em Dach und so:
Wenn d Wätterfee vor Kelti Mieh haig mit Verzelle,
sell doch der Littma e Container uffestelle.

Dä Drämmli-Ingenieur, das Niiderfluur-Genie,
muess ganz e grosse Fän vom Mani Matter syy.
Denn jedesmool, wenn e Combino goht uf d Runde,
no stoht er dert und singt: Y han e Dram erfunde,
wo immer nach zwai Stunde blybt stoh.

Elai im Drämmli bin y gsässe, doch am Spaledoor
do styyge zwanzig Typpen yy (dasch doch kai Männerchoor!)
mit Läädergilet, Ohreringli, Schmuddelhiet und meh,
am haiterhälle Noomidaag und wie wenn nyt wär gscheh.
Vor Schregg wott ych das Dram verloh,
doch isch es glaub scho zspoot,
denn gege tätowierti Brögge han ych doch kai Brot.
Si kemme grimmig uf mi zue, es wärde als wie meh.
Do langsam wirds mer klaar: Die wänn jo nur my Bylljee gseh.

Sii het e Huffe Gäld, und sii gits us, ringsum,
fir der FCB und firs Solarium.
Und sit em Fuesspilz letschte Summer sait der Maa,
sii sott halt ändlig au en aigene Whirlpool haa.

Kenne Sii das Gschichtli doo vo däm arme Massimo,
wo do letschte Summer soo druurig isch ums Spiile koo?

Wo s Ruthli Metzler uf em Haimwäg isch vom Shope,
rieft der Pilot: Y ka der Sinkfluug nimme stoppe.
Do legt sii s Heftli wäg und dänggt: Y zell bis zäh;
s wird sowieso Zyt zem der goldig Fallschirm näh.

S isch der neii Swiss-Verwaltigsroot en Alpefluug go mache.
Alli reede duurenander, jede waiss, wie me s sott mache.
Langsam wird s denn wiider stiller, will au das Rezäpt versait.
Und jetz wo mes hätt verstande, hänn si alli nyt me gsait.

Si hänn kai Mässeturm, si hänn kai FCB.
Y hätt drum däänen arme Zircher en Idee:
Wenn iir als Wältstadt wyterhiin im Gspreech wänd blyybe,
denn lend doch au emoll e Stadtroman lo schryybe.

E Depp, e bleede Siech, e Duubel und e Grytte
die kemme wäg em Inhalt vo däm Stadtroman ins Strytte.
Derzue kunnt dr Autor, dä flippt uss, und alli die
hänn die ganzi Nacht lang gschleegeret bis am andere Morge frieh.

S Dolly-Schoof isch gstorbe, o jee, o jee, o jee,
S Dolly-Schoof isch gstorbe, es git kai Wulle meh.
Ka d Striggedde nimm dichte wäge däm arme Vyych,
denn mien si druff verzichte. Dasch mir doch glyych..

Das isch s Lied vo de Fluugblätz, wo der Zuug halt
scho abgfahren isch und kai Fluugi me kunnt
und wenn d trotzdäm duesch waarte,
jo denn waartsch dert vergääbe.

S git Lyt die gänn sich mit Verhandle Mieh,
doch aine will dä Krieg jetz duurezieh.
Und was me no ka hoffe znacht im Bett:
Ass er Hemmige het.