2002

Ich ha als Vogel, stail im Aaflug vor em Lande,
dr Dialäggt us em Kontrollturm nit verstande.
Ischs Zircher Filz, ischs Basler Daig, was mi erwartet?
Das bruuch y baides nit. Drum bin i duuregstartet.

Es goht am Hansli wie am Bundesroot am Schluss:
Er rächnet: „26 26 plus“.
Will är nit waiss, wies goht und was die Zahl bedyttet,
luegt är zem Fänschter us und wartet, bis es lyttet.

Me well am Belche schyynts e dritti Rehre baue,
damit sich d Auti denn no drei mol meh dien staue.
Jä, in e Vollkanton do muess me investiere.
Die wänn doch wytterhiin e grossi Rehre fiehre.

S Rösli Hueber bringt me in drei Dail ins Spittel.
Zimmer D bis F ligt jewyyls jetz ai Drittel.
Hejoo, vom Achter und vom Elfer lyycht bedrängt,
hets ihre nümmi bis in d Schalterhalle glängt.

Mi dunggts halt, dass d Verona Feldbusch im Balari
ebbe glyych dumm schwätzt wie unsri Zanolari.
Mir isch d Verona trotzdäm lieber, Sii, das gilt:
Wenn d dert der Ton abstellsch, hesch wenigschtens no s Bild.

Es isch do geschter e Beschwärde ko an mii,
der letschti Värs dä sygi frauefindlig gsii.
Derbyy waiss doch in Basel jeedi Schreegstrich jeede:
Die liist dä Mischt nur ab, e Maa schrybt ihre d Reede!

Nur will ebber nit ka schryybe, sottsch nit lache.
Dasch nämmlig für dr Tschudi au e Trooscht, e schwache:
Dä waiss doch au nie, ob är – falls är no sott blyybe –
vo links no rächts oder vo rächts no links soll schryybe.

Me sait jetz neischtens Exhibischen-Squeer statt Messe.
Der Bahnhof haisst Stazione Effe-Effe-Esse,
s Hörnli Pöti-corn, d Schiffländi Schipping-länd
und s Theater Haus-of-läidiis-secend-händ.

Uf syyner Baustell luegt der Borer dääglig yyne,
nääben ihm sy Texas-Wasserstoff-Blondyyne.
Do maint e Sanitärmonteur in gnärvtem Doon:
Das triff sich guet, ych bruch no Hanf und Silikon.

Eines Tages – so schrybt scho der Martin Luther –
ist im Verwaltungsrat kein Platz für Moritz Sutter.
Doch gottsaidank stoot wyter unde no der Satz:
S kommt auch der Tag, da ist kein Platz mehr in der BaZ.

Me sett, damit die Gsamtverkehrskonzäpt nit schyttere,
dr Gotthardbasistunnel jetz massiv erwyttere.
Denn kenntsch, zem meh Transitverkehr uf d Schiine z fiehre,
au lähri Flugi quer dur d Alpe transportiere.

Wenn ych am Morge über d Strooss will, ha n ych Stress:
BL, BL, BL, AG, BL, BS,
BL, AG, Lö, Lö, AG, BL, SO,
BL, AG, AG, jä sinner alli doo?
BL, en 68er und denn nomoll drei,
BL, SO, Lö, Lö, AG und d Polizei,
BL, AG, en 68er wie ne Sau,
AG, BL, BL, jetz langsam gits e Stau,
ych schepf scho Hoffnig, doch beraits gohts wiider los:
BL, AG, jä isch d Novartis denn so gross?
AG, BL, BS (dasch sicher ain vo Rieche),
BL, BL, und nomoll hundert bleedi Sieche,
und das am Morge frieh, das isch doch biirewaich.
Do pletzlig wirds mer klar: Hitt isch jo Morgestraich!