2009

Die hänn kai Ahnig uff der Poscht, y finds verruggt,
Die hänn e Maise uff en A-Poscht-Maargge druggt.
Dasch e Belaidigung, wo flinggi Vögel gränggt,
denn rain symbolisch hätt e lahmi Änte glängt.

Uff dääre Fän-Maile (o.k. - s het lyycht gräägnet)
isch nach ere Maile mir e wytere Fän begäägnet.
My Frau am Delifoon het gsait: Kumm, bring en hai.
He nai, denn wäär dä Wurscht- und Bierstand ganz elai.

Wo der Füsilier Manetsch uff hoocher See
im Golf vo Aden het e finddligs Schnällboot gseh,
het äär das Schiff denn laider trotzdäm nit versänggt.
Denn der Pfäfferspray het nit bis iibere glänggt.

Ains und zwai, drei und vier und fimf und säggs,
linggs-rächts, Wieegeschritt. - Jä, Tango isch kompläx.
Als Namme fir e Drämmli kennt me sich dä spaare.
S muess jo nit danze kenne, s länggt scho, wenns ka fahre.

Y haa am neien Automat e Byylljee kauft
und will bim Staat hitt scho fascht alles online lauft,
han y am glyychen Automat in sällere Nacht,
bis s Drämmli koo isch, grad no d Styyrergläärig gmacht.

Bi mildem Wätter isst der Ospel als im Gaarte
e Château-Briand, finanziert us mym Erspaarte,
und gniesst sy Lääbesoobe dert mit Kind und Frau.
Der Marcel Rohner au
grilliert in Wollerau.
D Parzälle nääbedraa
die mecht der Kurer haa.
Mir dien nes nit verüüble
und wänn nit wyter grüüble.
So duet sich dert Parzälle an Parzälle dränge.
Doch fir die Heerre wurden e paar Zälle länge.

Jeedes Härz, wo ussetzt, gheert sofort massiert.
S gilt au fir Bundesröt. Bim Merz hets funktioniert.
Was macht me mit em Ueli Murer? frooge d Lyt.
Denn wenn e Hirni ussetzt, nutzt massiere nyt..

In färner Zuekunft - und do kaa der Conti stolz syy -
weiht äär denn s Geriatrie-Spidaal am Bruederholz yy.
Wenn alles glappt bis denn, no kann äär ohni Mieh
grad noch em Apéro sy Zimmer go bezieh.

Wo die Fraue z Binnige bim Tee im Gaarte
in zwai Stund nit ai ainzigs Fluugi gheere staarte,
do sait d Frau Vischer: S kennt aim no der Daag vermyyse.
Me waiss kuum, was isch schlimmer, d Gryyse oder d Byyse.

Sii luegt ihm dief in d Auge, fahrt sich iber d Lippe.
Doch äär duet numme s i-Phone stryychle und betippe.
Y mecht dy Touchscreen syy, huucht sii ibere Disch.
Die waiss no nit, wie schnäll sy Akku dunden isch.

Wo der Pändler Jules vo Hagethal-le-Haut
in Allschwil guet zwai Stund isch zspoot zer Aarbed koo,
do het er gsait: Es düet mer löid, und het sich gwunde,
y ho ersch z Kaiseröigscht e wysse Boorgblotz gfunde

Noch em Shoppe stoosst am Federer sy Frau
jetzt s Yykaufswäägeli als queer dur Wollerau.
Sit dass e Luppe draa haig, wurd sii so versueche,
syni Frinde mit der Luppe dert go z sueche.

Sit dääre SVP-Mediekomferänz
isch my Fäärnseh in Rekonvaleszänz.
Won y der Blocher gseh haa, wien er fiire dränglet,
han y halt d Schueh abzooge und se fiire bänglet.