2007

Immene Gaschthoof z Binze, wo nur s Beschte zellt,
han ych e 1986er-Bordeaux bstellt.
Und wo der Hauptgang kunnt, sag ych zem Schätzli: Waisch,
dä Wyy passt wurderbaar zem Johrgang vo däm Flaisch.

In der Schuel do stinggts am Hansli ganz enorm.
Är proteschtiert: Das is e Saich, die Uniform!
Wenn d kaini schygge Marke me darfsch zaige, hösch,
draag y halt Dolce-und-Gabbana-Unterwösch.

Hinde rächts dr Randstai, vornen e Passant,
do zwai Velofahrer, deerten e Hydrant,
mit Schwung uffs Inseli und ab ins Baustell-Kabel.
Doch sunscht fahrt unsren Ätti als no ganz passabel.

Es wurd waiss Gott doch au e Dram uff Weil verdraage!
Jä, s Rösli Hueber goht dert vyyl go Schnäppli jaage
und losst denn zfriide uff em Ruggwääg noch de Viere
au no grad s Hüftglängg und der Hallux operiere.

Wenn amme d Briedere Yakin miesste noch em Rääge
in ihrer Liigeschaft der Huusgang sälber fääge,
wurd jo d Frau Hofer und d Frau Lutz und der Herr Zwahle
fir das Vergniege gärn e bitz meh Mieti zahle.

Y hogg im Easy-Jet. S git kai Campari-Soda.
My Nochber stinkt und undedraa ligt s Wolgge-Meer.
Aine schnarchlet so, als wärs der Ventilator.
Und ganz elai am Flugplatz ligt my Necessaire.

Deal or no Deal, Music Star und s Housewife-Gschyss:
Was – bitte sehr – isch doo dervoo jetz d idée suisse?
Jä, wurdi d Cablecom dä Sänder au vernichte,
denn miessti d Schwyz nur uff der Samschtigsjass verzichte.

S wird unser Klima langsam zem Solarium.
Y glaub y bau mir jetz denn e Polarium
und biet die Wohnig au der Barbara Schneider aa,
falls si thermisch wiider Wallige sott haa.

Me frogt sich, was die Tagesschau am Handy sell:
100 Sekunde nur, doch jeedi Stund aktuell.
Do simmer aber froh, vo Rieche bis Birsfälde!
So kamen uns doch jedes Beben ainzel mälde.

Es git Kantön, die wänn der Wettbewärb meh schyyre.
Si dien drum Guet-Betuechti jetz pauschal bestyyre.
Doch bitte: Leend in Basel d Finger doo dervoo,
sunscht maint der Ospel no, er kenn jetz wiider koo.

S isch nyt als richtig, dass au d Baselbieter Gselle
an unser Stadttheater eppis zahle selle.
Mir kennten ihnen aber zem Entgeegekoo
derfir dr Almi und der Häbse iberloo.

Grad nääbe der Kasärne, vor em grosse Door,
brennt e Latärne, und me hehrt e Bootsmotor.
Bim Lyychtturm uff der Moole hegglet d Loreley
und singt: Wo blybt my Schorsch vom Haafebeggi Drei?