2000

Wo am Stephansdaag der Lothar und der Kurt
iber Basel wiete, waits der Tschudi furt.
Grad geschter isch e Karte us em Süde ko:
Im Herbscht, uf d Wahle hi, do syg er wiider do.

Im Bläsischuelhuus git d Lehrerin am Fritzli
e Zwai-bis-Dreier zrugg. Do hiilt dä zerscht e bitzli.
Denn rieft er wietig (will jetz stoht er uf der Kyppi):
Dasch agscheptier y nit!  Wir schehn unsch bei Filippi!

Ich heisse Kataschtrophen-Franz, so wahr ich lebe.
Ich kenne Wirtschaft, Politik und Krisenstäbe.
Nur etwas weiss ich nicht, und darum meine Frage:
Was ischt ums Himmelswillen eine Arteplage?

Im Altershaim zem Lamm waiss niemerts rächt, bigoscht,
obs jetz e Staatssarg git und was die Kischte koscht. 
Ych machs wie d Expo, sait drum ain ze syner Schweegere,
und due halt s Stärbe no ne Johr zwai uusezeegere.

Wie mänggi Frau rennt dääglig uf em Fitness-Band,
will s Träägerli vom Hanro-Top e bitzli spannt.
Nur d Gigi Oeri die blybt schlank, au ohni Renne,
denn s Nike-Lyybli duet jo s Fett diräggt verbrenne.

Dr Ueli Muurer frogt ganz heeflig aa bim Gölä:
Hetsch nicht an unserem Parteitag singen wöla?
Do macht der Gölä: Aazöle Böle schöle,
und dänggt: Y hät no zerscht d Chölä zelä sölä.

Au d Frau Stächeli bruucht s Internet zem Bstelle.
Si het bim Bell e magers Blätzli w - w - welle.
Dernoo fixiert si s CD-Laufwärgg, und si dänggt:
Tjo, fir ne Ossobucco hätt dä Schlitz nie glänggt.

Wo Telebasel dr Herr Kuenz befrooge lot,
wies ihm denn gfall als Mitgliid im Verfassigsrot,
do schruubbt dä zerschd am Heergräät, suecht s Gebiss nit wyt
und maint: Me kunnt halt so no bitzli under d Lyt.

Won yych do kirzlig bi queer iber s Hörnli tschumbblet,
hets pletzlig under em ne Graabstai komisch grumbblet.
Hänn Sii das au gheert? het e Gärtner zue mer gsait,
jetz het der Henri Dunant sich im Graab umdrait.

Die neii Gsellschaft Orange haigi zletschtemänd
nur en Abdeggig vo 90 %.
Jetz isch mer alles klaar: Die Firma isch doch gwiss
au der Sponser gsii vor Sunnefinschternis.