2021

Sändig SRF 27.02.2021, "Das  Beste aus 50 Jahren Schnitzelbängg"

---

Y wär parat. – Doch halt, y glaub so wird das nüt.
Wo sin d Ladärne? Wo sin d Räppli? Wo sin d Lüt?
S isch eender still am Heubärg und am Rhysprung ääne.
Wo isch my Helgebueb? Ah joo, in Quarantääne.
Statt Larve Massge und statt Druggede e Schyybe.
Und wo isch s Publikum? Y loss glaub s Singe blyybe.
Und au dä Zeedel do, dä könnt me sich jo spaare
und d Pointe, dört wo s goht, für s näggscht Johr ufbewahre.

Also:
Käi Värsli über d Stadt und d Baustell-Löcher.
Käi Witz zum B-A-G und zu sym Koch im Köcher.
Käi Wort zur Gläiserneuerig, der effiziänte.
Käi Värs zum Blocher synere adäquate Ränte.
Nüt zu de Rehli uf em Hörnli in der Nacht.
Käi Wörtli zu de plante Roche-Dürm drei bis acht.
Käi Värs zum Somm, wo sich bi uns nit ka entfalte
und jetz halt wenigschtens probiert der Näbel z spalte.
Käi Wort zum Kampf ums Präsidialdepartemänt. –
Oh jeemer näi, es hätt jo Sujet ohni Änd!

Y hör scho uf, mir wänn nit afo lamentiere,
will mir vor allem der Humor nit wänn verliere.

Me wäiss, dass Lache für s Syschtem jo relevant syg
und sich uf s nägscht Johr freue sicher nit riskant syg.

In däm Sinn: Aadie zämme, bis im 22!

---

Der Singvogel sitzt eläi uf em Baum und wartet uf d Fasnacht.    
(produziert vom Beat Manetsch in Zämmenarbet mit SRF)