2010

Film: Dr Singvogel rennt ins Drummeli.

Link zum Original-Film.

Nai, bin ych gsegglet, Sii, ych bi dehai zspoot gstartet.
Und do am Syttenyygang het ain uf mi gwartet.
Er het mi yynegloo. Dangg ihm hets no grad glänggt.
Dass dää scho Hundert isch, das hätt y au nie dänggt.

Will au e paar Johr Knascht bim Ospel nit vyyl bringe,
könnt me zer Stroof dä alti Super-Bänker zwinge,
feschtgmacht amme Stuehl und ohni e Narkoose
e Nacht lang Schnitzelbängg uf Telebasel z loose.

Zweenig Fluugi, zweenig Lyt und zweenig Gäld.
Jä, und das sell die bescht Armee syy vo der Wält?
No halb so gross und halb so wichtig. Wemme dänggt:
Do hätt e halbe Bundesroot waiss Gott au glänggt.

Es git schyynts allergattig Lyt, wo in den Alpe
nur grad mit Wanderschueh beklaidet ummetschalpe.
Was die ains Sunnecrème bruuche bis uf d Furka!
Elai vo doohär scho spricht alles fir e Burka.

Wie men in Partnerschaft d Spitalversorgig maischteret!
Au s Rösli Hueber mit sym Hallux isch begaischteret,
will s grad für Hallux wichtig isch, dass jedes Bett
jetz au sy aiges Härzkathederlabor het.

Si dien im Bläsischuelhuus jetz scho ab der Zwaite
sich syschtematisch uf Bologna vorberaite.
Grad geschter het der Hansli stolz verzellt bim Znacht,
är haig der Batchelor im Bleistiftspitze gmacht.

Wänn ächt die Fraue, wo ihr Kopfduech präsentiere,
jetz au scho s Eglisee schlyychend islamisiere?
Doch halt, villicht sinn s jo – me ka das nie ganz wisse –
nur arbetslosi Riechemer Diakonisse.

S will au der Otti Hundert wärde, und das paggt er,
dank Anti-Agingkürsli mit Event-Charakter.
Si dien im Gang vom Altershaim als noch de Viere
flyssig fir der näggscht Harasselauf trainiere.

Für 14 Daag goht d Müllere mit Easy-Jet
nach Tunesie und gseht dert e Minarett
und sait zer Huebere: Die dien do wyterbätte,
wie wenn si nyt vo däm Verbot erfahre hätte.

Die neui Kampffluugzüüg-Beschaffig, die git z reede.
Wenn ych Pilot wäär, wett y sicher kains us Schweede.
Y hätt der Bammel vor em wuchelange Knüüble.
Bi dääne muesch doch d Taili sälber zämmeschrüüble.

Wenn als die Gratis-Sperrguethüffe ummegammle,
goht s Schwyzer Färnseh schyynts im Dunggle au go sammle.
Si dien dä Grimpel sichte und neu arrangiere.
Und der Sven Epiney dä darfs denn moderiere.