2008

Bim Karli Odermatt isch praktisch alles nei:
Neii Wirbel, neii Huftglänk, neii Gnei.
E paar Orgaan vo friehner hett er kenne bhalte:
Vom Hals aa uffwärts, do isch alles no bim Alte.

Won ych der letschti Schalter ändlig gfunde haa
hinter Biecher, Schoggi, Lyym und Glettimaa,
do sait die Gumsle: Was, e Päckli! Dasch verbyy!
Dert ääne an der Kryzig, dert isch d Drogerie!

Jetz wo si scho im Kindsgi Hochdeutsch schwätzen müessen,
sott doch au d Hebamme das Kind auf Deutsch begrüessen.
Und fir e gueti pränatali Diagnose
sottsch scho bim Zyyge Radio Regenbogen loose.

S git näggschtens kaini Glepfer meh, won ych so schwärm.
Und schuld isch s Ändi vo den importierte Därm.
Jä, au s Tattoo darf kaini Glepfer me verwände.
Und schuld sinn die, wo so sinn, wie der Darm duet ände.

Sii macht Wäggselbeeder mit, die armi Hillary.
Mängmool isch sii lutt und mängmool ischs e stilleri.
Und falls sii gwählt wird, bahnt sich fir der Bill e Drama aa:
Si stelli schyynts als Praktikant denn der Obama aa.

Jetz fillt me d Preedig mit latyynische Zytaat aa:
ecclesia sanctus benedictus desolata.
Ych glaub nit, dass das in der Kirche gross duet steere.
Es isch jo sälten epper umme, wo s muess heere.

Wie doch das Gschäft mit de Tourischte guet floriert!
Kuum hämmer s Wohnmobil am Waldrand kurz parkiert,
kunnt ain mit Kerze, ain mit Tee und ain, wo häggslet.
Jä nai, jetz hänn die uns mit Dignitas verwäggslet!

Die US-Hypotheke-Krise isch nit fair.
Es gilt: Wer jetzt kein Haus hat, baut sich keines mehr.
Und pletzlig wirds mer klaar, was do der Rilke sait.
Dä maint der Ospel, wenn er schrybt: Herr, es ist Zeit.

Mängmool wärde aifach soo und iber Nacht
us alte Werter interessanti neui gmacht.
Zem Byspiil Stapi und Geburi oder Flohmi,
Petis, Dogi-Bägi, MuKi, Schnäbi, Omi.
Und s Fabi vo der Fälbi liist no s Tagi-Magi.
Am Nomi bringt sii d Kids im Buggy bis ins Tagi.
Hesch du d Medis? Gohsch zem Zahni? Kaufsch im Brocki?
Kanti, Psychi, KuMu, Sponti oder Stocki?
Am Radio loost me vor em WuKo als no s Regi.
Wär nimmt s Menu? Ych mecht Schnipo. Nimmsch du s Vegi?
Und gohsch go snööbe ohni Abi, nur im Pulli:
Dr Rega-Heli hooli alli, Hulli-Gulli.
Promi, Äschbi, Sigi: Hesch mer no ne Zygi?
Dasch logo, lago mio, mega gaga Gigi.
Und wenn y nimme wyter waiss, denn saag y schnäll:
Me seht sich an der Fasi! – Tschüss, e Scheene, gäll.