2015

Filmuffnahme vom Fasnachtsmäändig im Schauspiilhuus.

---

Au Politiker dien wäärbe für d Sponsoore.
Der Carlo Conti wirbt für Defibrillatoore.
Für e Coiffeurketti wirbt der Isaac Rääber.
Und d Anita Fetz die wirbt für Langzytglääber.

Me wird in Basel mit em Baue als wie frächer.
Das kaa nit guet goo. D Spatze pfyffes vo de Dächer.
Doch bi de Düürm, wo sich bi uns rasant vermehre,
sinn d Dächer z hooch, als dass me d Spatze no könnt hööre.

Drei jungi Hünd, fümf Liter Schnaps, e Windleständer,
e halbi Kueh und siibe Meeter Balkongländer,
en Aquarium und e Disch us Elfebäi.
Y ha jo gsäit, die nöie Drämmli syge z gläi.

Wär kaa die schönen alte Lieder no verstoh?
Im Kindsgi singt me: S Elfi-Glöggli lüttet schoo.
Hingeege z Baade wäiss me, was das duet bedütte:
S duet wider äine mit sym Selfie-Glöggli lütte.

S git Lüt, wo hooch im schööne Baselbiet dien wohne,
die mäine, Basel sygi e versüüchti Zoone.
Doch dummerwyys, jä das isch draagisch und verruggt,
hänn si statt Joodtablette Näi-Tablette gschluggt.

Im Volkshuus referiert der Blocher eloquänt:  
Die grossen Basler, wo die Schweiz gerettet händ!
Hejoo, die ghöören ihm, sinn alli braav und fromm:
Karl Barth, Hans Holbäi, Rudolf Wettstäi, Markus Somm.

En alte Wäschmaschiinefilter us em Käller,
s Schwyzer Stroofgsetzbuech plus 30 Kartondäller,
e Paggig bruuchti Pämpers, oordentlig verschisse.
Isch ächt em Baschi Dürr der Bebbisagg verrisse?

Wo der Götti het der Hansli loobe welle,
will är mit achti scho so priima könni zelle,
do säit der Hansli: Wäisch, ych bi au braav und flyssig.
Mir schaffe nämmlig mit em Lehrblaan 21, 22, 23 ...

Me het sich gfrogt, werums nur all die Mööbel het.
Sogaar am Määrtblatz Stiehl us Holz, e Disch, e Bett.
Wäiss ächt der Groossrootspresidänt, was är riskiert,
wenn är no nääbebyy e Bed and Breakfast fiehrt?