2005

Y stand im neie Jäggi, Mittelstogg 4 b
zwische Kaländer, Kaffi, Games und DVD.
Y fluech: Y suech e Buech! Do sait dä jungi Maa:
Rächts drei Stögg d Stäägen uff hets geschter no ains gha.

Wo der Lehrer frogt, was 4 und 7 git,
do sait der Hansli: Sii, do bruuch ych aber Zyt!
Er paggt sy Laptop us und maint in coolem Doon:
Y glaub y machs als Powerpoint-Präsentation.

Es haig der Gotthälf schyynts, vom Färnseh nit bifuegt,
als Daagesgascht im Sahlewaidli yynegluegt.
Äär bitrachtet schwyygend das Brimborium;
denn goht er zrugg ins Graab und drait sich deerten um.

Es sait der Blocher während em Znacht ze syyner Blochere,
won äär im Wurschtsalat garniert duet ummestochere:
In mym Departemänt entloss ych dääglig zwai;
bald han y s gschafft, denn bin y ändlig ganz elai!

S dien unseri Skirennfahrer, so wie die dien schlyche,
im Effiziänzgrad ammene B-Poscht-Päggli glyyche:
Bim Start do gläbbt menen e Strichcode druff als Zaiche,
zem se go sueche, falls si s Zyyl denn nit erraiche.

Damit me d Fasnacht ryybigslos ka duurefiehre,
isch s Polizeidepartemänt am Disponiere:
Me losst zer Sicherhait am Määntig vor de Viere
im Bahnhof Augscht der Zircher Äxtrazug blockiere.

Nachdäm der Chefchirurg im Färnsehstudio A
insgesamt zäh Kilo Fett het abgsuggt gha,
schiggt me das Material per Lift ins Studio 8,
denn offebar wird dert e Kochsändig gmacht.

Ob s miir denn gfallt im Sarg, das kimmeret mii hit nooni,
sygs Aiche, Sperrholz, Bambus oder Mahagoni.
Doch hätt y schandbar gärn, zem dääglig aimool schmunzle,
e Schlitz fir d Basler Zytig und e Taschepfunzle

Es luegt das Sex-and-the-City jeedi Frau.
Und ganz e huffe Männer luege haimlig au.
Jä jetz, wos fertig isch, do maint der Fritz zem Otti,
dass doch au d VKB jetz Fraue uffnäh sotti.