2020

Filmuffnahme vom Källerstraich im Basler Marionette Theater (zwäi Wuche vor dr abgsaite Fasnacht).
(Zur Verfiegig gstellt vom Basler Marionette Theater, Marc Gianola.)

---

Jetz spändet nägschtens scho der zwäiti Roche-Duurm Schatte,
und au der Clara-Duurm stoht bald scho vor der Matte.
Und wenn die fertig sin mit allem Drum und Draa,
fangt me bim Biozentrum äifach nomoll aa.

Si föön aa d Zügelkartons bstelle, d Royalischte.
S halbe Königshuus hoggt scho uf paggte Kischte.
Loos, Charly, froh zu sein bedarf es zimmlig wenig.
Und wenn du döört blybsch, wirsch villicht sogar emoll König.

Wo der Leader vo der Patrouille Suisse im Ziel isch
und denn erscht merkt, dass Langebrugg nit Mümliswil isch,
do rieft d Frau Amhärd: Halt! Die neue Jets mien warte!
Zerscht mien jetz Kompäss aane und e Schwyzerkarte.

Der Megge datet s Vreni, s Esthi und d Sabine
jewyyls am Barfi bi der Delifonkabyyne.
Jetz, wo die züglet isch, git das e tüüre Spass:
Bi so vyyl Dates do lohnt sich e Museumspass.

S wird schon e Grund gää, denn s Museum nimmt d Kabyyne,
wo sich als Dräffpunkt so bewährt het, zue sich yyne.
Für zue dym Schatz muesch zerscht bim Münschterschatz verbyy.
Es git si also doch, d Museumsstrategie.

Ych hätt als Maa, als wysse, alte, nie der Maage,
amene Grüppli Fraue "alti Dante" z saage.
Derbyy, wenn d d Larve wäglosch und dr ganzi Plunder,
denn sinn jo mäischtens alti, wyssi Männer drunder.

​Bim Znacht im Altershäim frogt d Schweschter Erika:
Wär will morn Halma spiile? Wär macht Mandala?
Do säit d Frau Huubesack und stryychlet ihre Puudel:
Für soone Froog do machsch normaalerwyys e Doodel.

Y bstell e Pfünderli, drzue e Mäitlibäi.
Do häissts: Dasch nit korräggt, Sii, göhn Sii wider häi.
Y dräi mi um, kumm wider zrugg und sag vergniegt:
Y möcht e Pfünderli und e Genderli. – Do han ys griegt.

Es söll schyynts Bänker gää, die hänn sich uf der Latte.
Si gänn sich geegesytig Uffdrääg zum Beschatte.
Und für das positive Image – allemaa –
mien si vo uns die negative Zinse haa.

Drei, wo nöi gwählt sin, hän in Bärn e Wohnig gfunde.
Der WG-Ämtliplaan isch mit ere App verbunde:
en App, wo yykauft, putzt und uffruumt in der Wohnig.
Nur wär se vor der Sitzig wigglet, wäiss me nonig.

Die neuschti Kult-Serie spiilt im Regierigsroot:
Dr Baschi kocht, d Tanja kunnt, der Hampe goht.
Und ob s Elisabeth duet wyter Suurkrutt raffle,
erfahrt me denn vermuetlig in der nägschte Staffle.

Hellou hellou! Whot mean you? – I not underständ.
What want you ask me? – I‘m the chief of switzerland. 
Yes yes, no no. – Was säit si? – I have no idea!
Sit Pisa weiss me s jo: D Buebe hänn e bitz Mieh.