2022
|
Filmuffnahme vom Fasnachtsmäändig im Schauspiilhuus.
|
|
|
Y haa am Rhyywääg unde hundert oder meh
so Hunde-Schyssdrägg-Güggli-Präss-Container gseh. Naase zue und mit em Velo duuregflitzt! Do het my äin vo däne Käschte grad no blitzt. |
|
|
Ganz stolz het s Vreni Hueber d Löösli-Nummere gnennt
an der Tombola bim Zürcher Impf-Event. Mit vollem Raclette-Buuch isch si in d S-Bahn gsässe und säit: Ou näi, jetz han y s Impfe ganz vergässe. |
|
|
Zoobe spoot do hört mes Schreie, denn und wenn,
in London an der Downing-Street im Nummere ten. Der Boris Johnson het en Alpdraum-Nacht, e harti. Er dräumt, es gääb im Huus scho bald e Labour-Party. |
|
|
Es kaa bim Drämmlibylljeelööse jo nit klappe,
der Wääg vo A nach B per Handy-App z berappe. Um d Streggi Kunschtmuseeum–Bankveräin nur z nenne: Wie söll dört s GPS en Unterschiid erkenne? |
|
|
Y haa d Boscht gsuecht – und dä Service public gfunde:
E Meter zwanzig bräit, im erschte Käller unde. Um dä Schalter punkto Grössi z überbiete, könnt d Boscht am Schlüsselbärg no s Pissoir zwüschemiete. |
|
|
Y han e Tryychle bstellt. – S Versandhuus het mer gschriibe,
si syyg bi Suez im Kanaal hängge bliibe. Jä, s Blääch und s Lääder sin hüt au globalisiert, und s Wörtli Freihäit wird in China yygraviert. |
|
|
Es säit e Basler Duube zue sym Basler Dyybli:
Y wäiss nümm rächt, bisch du jetz s Männli oder s Wyybli? Si göhn ins Näscht und mache, was me halt so macht. Denn säit er: Stärnli, liebs Stärnli, guet Nacht. |
|
|
S isch nätt, dass d SVP uns Stedter nit vergässe het.
Denn wo dä Wolf z Lauwil die siibe Gäissli gfrässe het, käämt är jo liebend gäärn au bis uf Basel aabe. Gottsäidank hets zwüsche Stadt und Land e Graabe. |
|
|
Y bi rasch über d Stroos. – S isch root gsii, allem aa.
Scho säit dä Schugger: Hänn Siis äilig? Na na na! Y zahl e Zwanzger, was jo wiirgglig nit so toll isch. Jetz hoff y, s näggscht Moll sygs e Tschugger üs em Wollisch. |
|
|
Kurz noch der Volksabstimmig zur Primaatehaltig
suecht d Gorilla-Daame s Gsprööch mit der Verwaltig. Sii möcht halt drotzdäm – wie mir alli doo uf Ärde – Assistant-key-account-product-manager wärde. |
|
|
Wo sölle Rächt und Pflichte für Primaate ände?
Me könnt se wenigschtens für uns Orgaan lo spände. So Diskussioone kaa sich s Rösli Meyer spaare. Si het beräits en Affezahn – bim E-Bikefahre. |
|
|
Es het am Färnhäizkemmi so ne farbigs Zäiche.
Vom vyyle Ärdgas-häize fangt das aa verbläiche. Jä könnt me nit, ganz ohni s Völkerrächt z verletze, das Zäiche jetz dur d Farbe gääl und blau ersetze? |
|
|