2004

Dr Singvogel am Ufftaggt im Stadttheater.

I ha fir d Feerie welle d Poscht um-adressiere.
Do kasch diräggt grad vor em Schalter go cämpiere.
Ändlig draa sag ych zem Frollain: Leen Sii s syy,
s het sich erleediget: D Feerie sinn verbyy.

Si hänn im Bläsischuelhuus hitt statt Durne Franzi.
Was!, schreyt der Hansli, das soll ächti Korkondanz syy?
Är stoht vor d Lehrerin und sait in scharfem Doon:
Jä Sii, sunsch gang ich halt in d Proposition ...

D Pro Senectute het, damit s fir alli länggt,
em Bundesroot e wyteri Pissoir-Schissle geschänggt.
Denn jetz wo so vyyl alti Heere ummehange,
stohsch dert und kasch en Ewigkait uff d Leesig blange.

Jetz gits an jeedere Drämmli-Haltstell Elektronik.
Nummen eppis ka die Elektronik noonig:
Es fählt der Hiiwyys, ob das Drämmli in ere Stund
eenter in de oder näb de Schiine kunnt.

Mir isch e soone Baselbieter Off-Road-Kaare
z Birsfälde partnerschaftlig hindenyyne gfahre.
Scho stehn die erschte Gaffer umme, kuum het s dätscht,
denn mii het s under däm sym Spoiler yynegwätscht.
Nach finf Minute isch der Rettigswaage doo.
Doch s isch der falschi, s miessi dää us Lieschtel koo.
Y fang aa freschtle, und der Puls isch zimmlig dunde,
do schreit mii aine aa: Was mache Sii dert unde?
Und wo denn d Saniteet nach ai-dreiviertel Stund –
es haig e Stau ghaa in der Hülfte – ändlig kunnt,
froggt mi der Nootarzt, wo n y wohn, und losst my ligge,
denn Basler darf me kaini me uff Lieschtel schigge.
Do mäldet sich per Natel no der Erich Strauma
und sait: Mrrr näääme kaini mit me Schleuderrrtrrrauma.
Kurz vor em Koma hehr y knapp no aine saage:
Waisch waas, mer dien en aifach iber d Gränze draage.

Jetz well der Bush au uff em Mars no Stimme griege.
Er well perseenliig uf eme Druthahn aanefliege.
Y kaa s kuum glaube, doch er staarti moorn am drei ...
Jä, und fir d Wält wär das denn der Thanksgiving Day.

Der Couchepin bysst vor Wuet ins linggi Ohr vom Blocher,
der Leuebärger brielt und filzt am Schmied der Locher,
der Deiss liggt uff em Merz und wirgt en, s isch ai Wiete.
Und d Calmy-Rey sitzt dert und muess die Buebe hiete.