Porträt

Wemme die erschte Vögel höört singe, isch das e Zäiche, ass der Winter z Änd goht. Zämme mit andere isch denn z Basel ammen au der Singvogel unterwägs. Är singt doo und döört, lut und fräch, schreeg und lätz.

Aagfange het alles kurz vor dr Fasnacht 1994. D Väärs wäre baraat gsii, aber weder Laarve no Goschdüm. «Ummefrooge hets brocht. Scho sin mir e baar Sache zur Uswahl gstande. Es het pressiert. Öppis, wo uf Aahiib basst het, isch e gääle Vogel gsii.» Soo isch dr Singvogel entstande. S Goschdüm het denn allerdings scho nach em erschte Johr miesse amme andere wyyche, der charkteristischi Kopf isch neu entstande und d Figuur vom gääle Voogel isch ergänzt worde mit der Figuur vo dr Papagena, wo als Helgedräägere amtet. Sit em Aafang schafft der Singvogel mit em glyyche Helgemooler zämme.

Dr Singvogel isch e Comité-Bangg und lauft zämme mit dr Papagena am Määndig- und am Mittwuchoobe d Route (Bäize und Bühneveraastaltige). Er het scho an dr äinte oder andere Voorfasnachtsveraastaltig mitgmacht (Drummeli, Charivari, Ladärnli, Ridicule, Pfyfferli, Ufftaggt, Stuubede, Källerstraich, Fasnachtshuus). Im Marionette Theater gits e gläine Singvogel-Kolleeg an Fääde, wo mängmoll imme Kinderstüggli daarf mitspiile. Im Pfyfferli vom Theater Fauteuil isch dr Singvogel sit em Johr 2005 regelmässig derbyy. Friehner isch er ammen au, zämme mit de Stroossewischer, unter em Namme Anneli und Hansli uf dr Bühni gstande. Äimoll isch er zämme mit em Basler Symphonieorcheschter ufdrätte, und äimoll het er als Gascht an der Fasnacht in Chur mitgmacht.

Under em Titel «lääse, luege, loose» findsch us jeedem Johr e paar Byspiil vo Väärs und Helge. Doo und döört hets au Doon- oder Filmufnahme. Die stamme vo unterschiidlige Veraastaltige in Bäize, Käller oder Theater.

Dr Singvogel am Källerstraich im Marionette Theater

Anneli und Hansli am Ridicule