2023

Filmuffnahme vom 22. Hornig 2023 am Schnitzelbank-Benefiz-Abend.

---

Hänn Sii s gmerkt? Es stoht käi ächte Vogel doo.
Villicht fühlt sich jetz öpper unwohl oder soo.
Doch nur käi Angscht, au wenn me doo däm Dryybe huldiget:
Y haa mi z Sämpach scho pro forma mol entschuldiget.​

Mii dien weissgott die Plauderkasse jo nit stööre.
Und jetz het d BVB au Plauderkontrolleure. 
Y ha verzellt, werum y grad käi Bylljee haa.
Do säit dä: Halt! Verzell du das am Fährimaa.​

S isch zmitts am Voormidaag, und drotzdäm hets e Stau.
Döff und Auto, sogaar d Velo warten au.
Vo wytem seht me: Der Verkehrsdienscht stoht derbyy.
Das wird vermuetlig sone Plauderkrüzig syy.​

Im Himmel säit der Benedikt zur Queen: Mir schyynts,
your funeral is much pompööser gsii als myyns. –
S kunnt halt druf aa, säit sii, wie fescht dass s Volk äim maag.
Und bitte: Yych ha gschuftet bis zum letschte Daag!​

Ych ha in der Jugend under em Brueder glitte.
Amme Zyschtig 1970 hämmer gstritte.
Und zwäimool isch der Vater ohni mii in d Ferie.
Das sött doch länge für e Buech und für e Serie.​

Wenn öpper Bundesroot will wärde, ischs wie friehner:
Der Beat Jans liist scho Broschüüre über Hiehner.
Und au der Ängelbärger möchts jo gärn versueche
und duet jetz ab und zue e Landdienschtwuche bueche.​

In däm neue Kaffi dört bim Spaaledoor
säit dä, wo ummerennt: Mir sin e Pop-up-Store!
Latte macchiato, näi, das hätt bi uns käi Zwägg.
Denn bis dä fertig isch, simmer wider wägg.​

Hänn Sii au d BZ glääse? Näi, s isch zum Erbläiche:
Zwüsche Niiderdorf und Hölschte klemmt e Wäiche!
Me wünscht sich s Bähnli wider zrugg. S isch e Skandaal!
Emänd passt wirklig numme Schmaalspuur in das Daal.​

Wär stoht denn doo im Räge uf der Abwärtsstäge?
Vo wäge Räge: S isch nit nur am Däge gläge.
Doch s wär verwäge – ych sags us der Vogelwarte –
wenn d duesch im Räge äifach uf e Vogel warte.​

S stoht sone Beyeler-Figuur uf der Verwaltig
und luegt zem Fänschter us in arbetsamer Haltig.
Isch das jetzt Kunscht am Bau?, frogt irritiert d Frau Spächt.
Nänäi, jetz het er sich bewegt, näi, dä isch ächt.​

Won e dunggli Gstalt spoot in ere dunggle Nacht
im Dalbebrunne elegant e Spiessli macht,
do dänkt d Frau Köchli hindrem Fänschter: Ou, nit schlächt!
Geschter d Wassermuusig, hüt der schwarzi Hächt!